Kinaluunniit 15-30 akornanni ukiulik pitsaasumik iliuuseqarusuttoq inuusuttunut INUA-mi kajumissutsiminik sulisuusinnaavoq.

Kajumissutsimik sulisugut assigiinngilluinnartunik tunuliaqutaqartarput assigiinngitsunillu ilinniaqqiffinni ilinniartuullutik, ilinniarnertuunngorniarlutik imaluunniit suliffeqarlutik. Ilaat suli angajoqqaaminni najungaqarput allat ilaqutartaareerlutik ilaallu imminnut pilersorlutik.

Inuunerisimasannut siunissannulluunniit arlaannik piumasaqaateqanngilagut. Taamaallaat kissaatigaarput piffissaqarnissat piumassuseqarlutillu ataatsimiinnernut sammisaqartitsinernullu ataatsimoorluta kivitseqatigiinnitsinni takkuttarnissat 🙂

Inuusuttunik allanik suleqateqarnissarnut Kajumissuseqassaatit. 🙂  

Nalunngilarput inuusuttut TAMARMIK nukittuffeqartut, taamaattumik kinaluunniit kajumissutsiminik sulisuusinnaavoq. Pisariaqanngilaq oqaaseqartuunissat guitarertartuunissat imaluuniit aliikkusersuisartuunissat. Taamaallaat piumassuseqassuutit piffissaqarfigalugu inuusuttunut peqataanikkullu iliuuseqarnissat – qanoq ajornartigisinnaangami? 🙂

Inuusuttunut sammisassaqartitsineq

Kajumissutsimik sulisutut sammisassaqartitsineqartarpoq amerlasuunik ingerlanneqartartunik illoqarfinni assigiinngittuni INUA peqataaffigisaani. Sammisassaasinnaasut tassaasinnaapput filmertitsinerit, timersuutit assigiinngitsut, igaqatigiinneq, nipilersorneq imaluunniit asimut unnuiartorneq.

Kajumissutsiminnik sulisut illoqarfingisaminni aaliangertarpaat aaqqissuullugillu sammisassat. Kajumissutsimik sulisutut ataqatigiissaarisutut sulisarput aamma peqataaqataalluni nalunaarnikunut nalingalugillu.

Inuusuttut attaveqatiginerani assigiinngittunik pisoqarsinnaasarpoq kajumissutsikkut sulinermi akunnakusoorsitsisumik iliuuseqarnissamut. Taamaattorli sungiusarneqarnermi aammalu ilinniaqqinnermi kajumissutsimik sulisunut neqeroortoqartarpoq qanoq pisut artonarsinnaasut qaangerneqarsinnaaneri. Soorunami aamma apeqqutissaqaraanni tikilluaqqusaajuarput INUA allaffeqarfianut.

EQQAAMALLUGU – INUAmi kajumissutsimik sulinerni kisimiinngisaannaravit!

Suliassat allat

Inuusuttunik peqateqarnerup avataatigut kajumissutsimik sulinermi suliassat ilagaat INUAmi suliassat. Tassa nammineq pikkoriffigisatit neqeroorutigisinnaavatit. Imaassinnaasoq allattariarsornikkut pikkoriffeqartutit? Imaluunniit facebook atorneratigut pikkoriffeqartutit? Imaluunniit pikkoriffigingit allat kajumissutsimik sulisut nuannaartinnissaanut nassaarsiullaqqittutit!

INUAmi illiuvoq kajumissutsimik suleqatisillu naalagaasut! Takorluuisinnaanerit kisimi killiliisinnaavoq, tamaattumik INUA isumassarsiarnut tikilluaqqusivoq.

KRK-INUA illoqarfinni tallimaasuni immikkoortortaqarfeqarpoq: Aasiaat, Sisimiut, Nuuk, Qaqortoq kiisalu Tasiilaq.

Sammisassaqartitsinerit illoqarfinniik illoqarfinnut annertussutsimikkut assigiinngissutsimikkullu assiginngiiaarput. Tikilluaqqusaajuaannarput sumiifiimmi INUA attavigissallugu isumassarsiat pillugit aammalu paasisaqarluarnerorusukkaanni.

Illoqarfigisanni INUA pillugu paasisaqarnerugit uani